ရခိုင်တော်လှန်ရေးနိဒါန်း (အစ/အဆုံး)

Arakan Revolution PDF File Download

ရခိုင်တော်လှန်ရေးနိဒါန်း
------------------------------
မဟာဝိဟိံက မော်ကွန်းလင်္ကာ
------------------------------
မဟိရန်သူ၊ ဖက်မပြူသား၊ သုံးလူထွဋ်ထား၊ မြတ်ဘုရား၏၊ ကိုယ်စားရုပ်ဝါ၊ ခြောက်ရောင်ဖြာ၍၊ မဟာမုနိ၊ ဘုရားကြီးကို၊ ညွတ်ပြီးကော်ရော်၊ ရှိပူဇော်၍၊ ပင့်ခေါ်ပြီးမှ၊ ရက္ခပူရ၊ နန်းမဒေ၀ီ၊ မဟေသီနှင့်၊ အညီယဿ၊ ရံမောင်းမကို၊ ယူကြစုပြီ၊ ဆောင်ယူလီ၏။ သင့်နီဌာန၊ ရပ်ဒေသ၌၊ စောင့်ထပြီးခိုင်၊ လက်နက်ကိုင်ရို့၊ အနိုင်ပြုလျှင်း၊ ရဲမက်ချင်း၏၊ မြို့တွင်းမှန်သား၊ မြို့ပြင်များနှင့်၊ တိုင်းကားရပ်ဌံ၊ နာဂရံဟု၊ နိုင်ငံအပေါင်း၊ တောမြို့ကောင်း၌၊ ပုန်းအောင်းနီငြား၊ ရခိုင်သားကို၊ ယောက်ျားမိမ္မ၊ မလွတ်ရအောင်၊ ချိုင်နှောင်တန်းလန်း၊ ကျွဲနွားဖမ်းသို့၊ လိုင်ဂုတ်ကိုဖြတ်၊ အသီသတ်၏၊ ချောမွတ်ရူပ၊ မိမ္မလှကို၊ ပဉ္စအာရုံ၊ ကာမဂုဏ်ဖြင့်၊ မြူးတူးစိမ့်ငှာ၊ ယူကြပါ၏။ သူနာသူအို၊ ကျိုးကန်းကိုကား၊ မလိုပိတ်ထား၊ တိုက်လုပ်ငြား၍၊ သွင်းထားအပြည့်၊ ယမ်းဆီးထည့်လျှက်၊ မြိမြေ့ညက်ကြီ၊ မီးတိုက်စီ၏၊ သီလီမကြွင်း၊ လူခပင်းရို့၊ ချင်းချင်းနွီးနွီး၊ ကနိမွီးသား၊ သားထွီးသားငယ်။ အပုချေရို့၊ ပြုံးရယ်ရွှင်ဘိ၊ မှည်မသိကို၊ မွီးမိထံက၊ ယူပြီးမှလျှင်၊ လက်နှင့်ကိုင်မြှောက်၊ ကောင်းခင်ရောက်က၊ အောက်ကတဖန်၊ ဓါးကိုလှန်၍၊ ခံပြန်ပြီးခါ၊ ပြုသည်မှာကြောင့်၊ ကျကာမလွဲ၊ ရဲရဲသွီးစက်၊ အအူထွက်၏၊ တချက်မြီ၌၊ လှံကိုစိုက်၍၊ ခံလိုက်တံကျင်၊ ရင်က၀င်၏။ နှစ်လိုပျော်ပါး၊ သားမယားကို၊ ပေါင်းကြအတူ၊ မထားမူဘဲ၊ ဆွဲယူရိုက်သတ်၊ နားကြိုးတပ်လျှက်၊ ပူးပြွတ်ချိုင်နှောင်၊ ကြက်ကိုလှောင်သို့၊ ပုံဆောင်ပမာ၊ ယူကြပါ၏၊ များစွာခွတ်ထစ်၊ သတ်၍ပစ်လျှက်၊ အချစ်ဝါသနာ၊ မဟိပါငြား၊ ပျူအောက်သားသည်။ စကားမုသာဝါဒီတည်း --။

ပုံဘိတောင်နှယ်၊ ကောင်ပုတ်ဝယ်ကား၊ လူငယ်တသောင်း၊ လူကြီးပေါင်းမူ၊ သျှစ်သောင်းအစွန်၊ တသိန်းလွန်၏၊ အမှန်ယင်းခါ၊ သီလီပါ၏၊ သိမ်းကာယူထ၊ ပြည်အင်းဝသို့၊ ပါရလီငြား၊ လူယောက်ျားနှင့်၊ မပြားမှန်ထ၊ လူမိမ္မကို၊ တွက်ချရွီသော်၊ နှစ်သိန်းကျော်၏၊ ကြားသော်မြင်ခါ၊ ကြောက်ဖွယ်သာတည်း၊ ဒွါရာသံတွဲ၊ မြို့ရမ်းဗြဲနှင့်၊ မြစ်တဲဝန်းမြောင်၊ ကျွန်မာန်အောင်၌၊ ဖမ်းနှောင်ချိုင်လျှင်း၊ ယူလီခြင်းကို၊ သတင်းစကား၊ နားသာကြား၏၊ မှတ်သားတထစ်၊ ရွီတွက်စစ်၍၊ တစ်နှစ်သုံးလေး၊ စာနှင့်ရေးပြီး၊ ပီးသူမဟိ၊ ဖြစ်လီဘိခြင်း၊ ဇိဝင်္သခါ၊ ယုံမှားစွာဖြင့်၊ ဆိုရာစကား၊ ကျယ်ဝန်းလျှား၏၊ သီလားအကောင်၊ ဖူးဖူးရောင်၍၊ ပုပ်ဟောင်နံစော်၊ ရုပ်ခန္ဓာကို၊ ကာကာလင်းတ၊ သိန်းစွန်မှသည်၊ ခွီးကစလျှက်၊ ကျားသစ်ဝက်ရို့၊ လုယက်ဖန်ဖန်၊ ကိုက်စားဟန်ကို၊ ကျန်လူအများ၊ မြင်လီငြားမူ၊ ဘုရားတရား၊ သံဃာများကို၊ အားကိုးပြီးခါ၊ မြည်တမ်းပါ၍၊ ငိုခါရွီရွတ်၊ နဖူးသတ်သည်၊ ရင်ဖတ်လက်တင်ခတ်တီးတည်း --။

ရခိုင့်တော်လှန်ရေးနိဒါန်း (ပထမပိုင်း)

(ရခိုင်ရာဇ၀င်သစ်ကျမ်းမှ ကောက်နှုတ်ဖော်ပြပါသည်။)

ကုန်းဘောင်မင်းဆက် မြန်မာဘုရင်ဘိုးတော်င၀ိုင်း၏သားတော် အိမ်ရှိငဥပရာဇာဦးစီး၍ ရာမရကန်ငတိုးလိုက်ပါသော မြန်မာကျူးကျော်သူနယ်ချဲ့ရို့သည် လွတ်လပ်သော အချုပ်အချာအာဏာလက်နက်ပိုင် ရခိုင်နိုင်ငံတော်ကြီးအား ရခိုင်သက္ကရာဇ် (၁၁၄၆) ခု ပြာသိုလဆုတ် (၇) ရက် စနီနိ။ ခရာဇ်သက္ကရာဇ် (၁၇၈၄) ခု ဒီဇင်ဘာလ (၃၁) ရက်နိတွင် မတရားကျူးကျော်သိမ်းပိုက်လိုက်သဖြင့် ရခိုင်ပြည်နှင့် ရခိုင်လူမျိုးရို့သည် မြန်မာကိုလိုနီကျွန်ဘ၀သို့ ရောက်ခြင်းမလှရောက်လားရသည်။

ရခိုင်နိုင်ငံတော်၏နောက်ဆုံးဘုရင်မဟာသမတရာဇာ (နံတော်စနီသား၊ သက်တော် ၄၂ နှစ်၊ နန်းစံ (၂) နှစ်အား) ရခိုင်သက္ကရာဇ် (၁၁၄၆) ခု ပြာသိုလဆုတ် (၁၅) ရက် တလဂုင်္နီနိ။ ခရာဇ်သက္ကရာဇ် ၁၇၈၄ ခု ဇန္န၀ါရီလတွင် မြန်မာကျူးကျော်သူရို့သည် မတရားဖမ်းဆီးသံခြီချင်းခတ်၍ မြန်မာပြည်သို့ အကျဉ်းသားအဖြစ် ဖမ်းဆီးခေါ်ဆောင်လားကာ အမရပူရမြို့တွင် ကွပ်မျက်စီရင်လိုက်သည်။

မြန်မာကျူးကျော်သူရို့သည် ရခိုင်နိုင်ငံတော်အားသိမ်းပိုက်ပြီးနောက် ရခိုင်နိုင်ငံတော်၏မြို့တော် မြောက်ဦးတွင် မြန်မာနန္ဒငပကျန်အား မြို့ဝန်ထား၍အုပ်ချုပ်ခိုင်း၏။ သို့သော် ရခိုင်ရို့သည် မြန်မာ့သူ့ကျွန်မခံဘဲ (၁၁၄၆) ခု တပေါင်းလကစ၍ ဒါးပိုင်ကြီး၏ယောက်ဖတော်ကျော်ပုံ၏ဦးဆောင်မှုကိုခံယူကာ မြန်မာကျူးကျော်သူများအား စတင်တော်လှန်သည်။

တောင်မင်းကြီးကျော်ထွီး၊ ယင်း၏နောင်တော် မုဇုန္တတ်ကြီးဘရွေး၊ ဒါးပြန်စီးရို့အမှုးပြုသော ရခိုင်တပ်များသည်လည်း မြန်မာကျူးသော်သူရို့အား အနောက်အရပ်က တော်လှန်တိုက်ပွဲဝင်သည်။

မြန်မာနန္ဒငပကျန်သည် ရခိုင်ရို့၏တော်လှန်မှုကိုအကြောင်းပြုပြီး အပြစ်မဟိသော ရခိုင်ပြည်သူရို့အား လက်နက်ချရန်ဟုအကြောင်းပြကာ ပေါင်းတုန်အရပ်၌တထောင်၊ သရက်အုပ်အရပ်၌တထောင်၊ စံကားတောင်အရပ်၌နှစ်ထောင်၊ မြို့တော်ပရိစ္ဆေဒ၌ သုံးသောင်းခုနှစ်ထောင်၊ ပုခက်တွင်းသားအသူငယ်ရို့အား ဒါးကဇတ်သည်ကတသောင်း၊ ဘုရားပေါ်အရပ်၊ ဒိုင်းကျီအရပ်၊ မောင်းဆွဲအရပ်၊ ငရကောက်အရပ်၊ ဂေါင်းပြိုတောင်အရပ်၊ ပုရိန်အရပ်၊ ပေါင်းတုတ်အရပ်၊ ရတနာပြည်အရပ်၊ လက်မဖက်အရပ်၊ တောတန်းအရပ်၊ ကိုးဆယ့်ကိုးတောင်အရပ်၊ သံတွဲ၊ ရမ်းပြည့်၊ မာန်အောင်အရပ်ရို့၌ လူပေါင်း တသောင်းသျှစ်သောင်းလေးထောင်ရို့ကို ယင်းနှစ်အတွင်းမှာပင် အဆုံးစီရင်လိုက်သည်။

ထို့အပြင် မြန်မာနန္ဒငပကျန်သည် ဒါးပိုင်ကြီးကျော်ပုံ၏မယား ကောင်းကျော်ထင်မကိုလည်း ကာမပိုင်လင်ယောက်ကျားဟိယင့်သားနှင့် ဗလက္ကာယယုတ်မာရိုင်းပြစွာ စော်ကားခသည်။

တောင်မင်းကြီးကျော်ထွီးသည် စစ်တကောင်းအင်္ဂလိပ်မြို့ဝန်ထံမှ စစ်ရေးအကူအညီရယူရန် ကြိုးစားသည်။ အင်္ဂလိပ်ဗိုလ်ချုပ်နှင့် တွိဆုံဆွေးနွေးရာတွင် ဒါးပြန်စီး၏သမက် သာမကောင်းစံရွှီကို ဘာသာပြန်ခိုင်းသည်။ သို့သော် မပြည်လည်သောကြောင့် မြို့သစ်ချောင်းညာဖက်သို့ခိုဝင်ကာ မြန်မာကျူးကျော်သူများအား ရရာလက်နက်စွဲကိုင် တော်လှန်သည်။

အားမတန်သဖြင့် လက်ဝဲမြန်ကုန်းဖောင်သည်၊ မုဇုန္ဒာတ်ကြီးဘရွေး၊ ဒါးပြန်စီးရို့သည် အနောက်စစ်တကောင်းနယ်သို့ခိုဝင်ရောက်လာ၍ အင်္ဂလိပ်မြို့ဝန်က ကျွန်းရွာများပီးသနားထား၏။

(၁၁၄၆) ခု ကဆုန်လတွင် တောင်မင်းကြီးကျော်ထွီးသည် အနောက်စစ်တကောင်းအရပ်၌ တပ်စွဲ၍ မြန်မာကျူးကျော်သူရို့အား ခုခံတော်လှန်ယင်း လက်နက်ထိမှန်ကျဆုံးသည်။

မြန်မာနန္ဒငကျန်၏တပ်များသည် တောင်မင်းကြီးကျော်ထွီး တော်လှန်သည်ကိုအကြောင်းပြု၍ မြို့သစ်ချောင်းအရပ်မှ မိမ္မအသူငယ်ရို့အား ကြိုးတုတ်ချိုင်နှောင်ကာ မြစ်ဝတွင်ပစ်ချ၍ သတ်ဖြတ်လိုက်သည်။ အနောက်စစ်တကောင်းအရပ်မှ ရောက်လာသူ လူအပေါင်းရို့ကိုလည်း တောင်မင်းကြီးကျော်ထွီး၏လူဟုစွပ်စွဲကာ များစွာသတ်ဖြတ်လိုက်သည်။

ရခိုင်ပြည်တောင်ပိုင်း အနောက်ခုနှစ်ရိုင် တောင်စိုင်အရပ်၌ စနည်းရွာသားရို့သည်လည်း မြန်မာ့သူ့ကျွန်မခံဘဲ ရမ်းပြည့်စားဗိုလ်ပေါလုံး၊ လမုစားဗိုလ်လာခိုင်ရို့နှင့်ပေါင်းဖက်ကာ မြန်မာကျူးကျော်သူရို့အား တော်လှန်တိုက်ပွဲဝင်သည်။ ဤသည်ကိုအကြောင်းပြု၍ သံတွဲမြို့ကို ကျူးကျော်သိမ်းပိုက်ထားသော မြန်မာရာဇငသင်္ကြန်သည် သူ၏စစ်ကဲငလှကို လွှတ်ကာ စနည်းရွာသူရွာသားများအားလုံးကို အစတုန်းခြီမှုန်းလိုက်သည်။

မြန်မာကျူးကျော်သူရို့သည် ၁၁၄၉ ခု တပေါင်းလတွင် ရခိုင်ပြည်မှ ဘုန်းကြီးရဟန်း၊ မင်းသားမင်းသမီးစုစုပေါင်း ခုနှစ်ထောင့်ခုနှစ်ရာကို အမရပူရမြို့သို့ ဖမ်းဆီးခေါ်ဆောင်လားသည့်အပြင် သက္ကရာဇ် (၁၁၅၁) ခု နံယုန်လတွင် မြောက်ဦး၊ သံတွဲ၊ ရမ်းပြည့်၊ မာန်အောင်၊ လေးမြို့စသည်အရပ်ရို့က လူပေါင်းခြောက်ထောင်ကိုလည်း ယိုးဒယားသို့စစ်တိုက်ရန် ဖမ်းဆီးခေါ်ဆောင်လား၏။

သက္ကရာဇ် (၁၁၅၀) ပြည့် နတ်တော်လဆန်း (၉) ရက်နိတွင် မြန်မာအနောက်ဖက်ငတိုက်ဝန်သည် ရခိုင်နိုင်ငံတော်မြောက်ဦးမြို့သို့ ၀န်ပြုလာပြီး (၂) နှစ်ကြာလျှင် ရာထူးမှ ပြုတ်ကျ၏။ မြန်မာပုသိမ်ငသခင်သည် ငသီဟဘွဲ့နာမည်ကိုခံလျှက် ၁၁၅၂ ခု တပေါင်းလတွင် ရခိုင်နိုင်ငံမြောက်ဦးမြို့၌ ၀န်ပြုလာပြန်၏။ တနှစ်ဟိလျှင် သီ၏။

ပုသိမ်ငသခင်စုတေ့ပြီးလျှင် မြန်မာတိုင်းတာဝန်သည် အာကာကငကျော်ထင်ဟူသောနာမည်ကိုခံယူလျှက် ရခိုင်သက္ကရာဇ် (၁၁၅၃) ခု တန်းခူးလတွင် ရခိုင်နိုင်ငံမြောက်ဦးကို ၀န်ပြုလာပြန်၏။ ယင်း အာကာငကျော်ထင်သည်လည်း (၂) နှစ်ဟိလျှင် ရာထူးမှချောကျ၏။ အာကာငကျော်ထင်ရာထူးမှချောကျပြီးလျှင် မြန်မာငကျော်လှသည် ငလှရာဇာဘွဲ့ကိုခံယူ၍ ရခိုင်သက္ကရာဇ် (၁၁၅၅) ခု တပိုးထွဲလဆန်း (၉) ရက် စနီနိတွင် ရခိုင်နိုင်ငံမြောက်ဦးမြို့သို့ ၀န်လုပ်လာပြန်၏။

ငကျော်လှလက်ထက်တွင် ရမ်းပြည့်စားဗိုလ်ပေါလုံး၊ ဗိုလ်ခွင်းပေါက်၊ ဗိုလ်ကျွဲတကောင်နိုင်ရို့သည် အနောက်စစ်တကောင်းနယ်ကို ခြီကုတ်ယူကာ မြန်မာကျူးကျော်သူများအား တော်လှန်တိုက်ပွဲ၏။ နေမျိုးငကုန်ဒရာ၊ ငပေါတလီစသော မြန်မာတပ်မှုးရို့သည် အင်္ဂလိပ်စစ်တကောင်းမြို့ဝန်နှင့်ပေါင်းဖက်ပြီး ရခိုင်ဗိုလ်ပေါလုံး၊ ဗိုလ်ခွင်းပေါက်၊ ဗိုလ်ကျွဲတကောင်နိုင်ရို့အား ဖမ်းဆီးပီးရန်တောင်းဆို၏။

မြန်မာသူယုတ်ရို့သည် ရမ်းပြည့်၊ မာန်အောင်၊ မြောက်ဦး၊ လေးမြို့အရပ်အသီးသီးမှ လင်မယားအိမ်ထောင်စုံတအိမ်ကို ငွေဒင်္ဂါး (၅) ပြားစီကောက်ယူပြီးလျှင် စုစုပေါင်းငွေဒင်္ဂါး တသိန်းနှစ်သောင်းကို အင်္ဂလိပ်စစ်တကောင်းမြို့ဝန်အား လဘ်ထိုး၏။ စစ်တကောင်းအင်္ဂလိပ်မြို့ဝန်သည်လည်း ရခိုင်ဗိုလ်ပေါလုံး၊ ဗိုလ်ခွင်းပေါက်၊ ကျွဲတကောင်နိုင်ရို့အား ဖမ်းဆီး၍ (၁၁၅၆) ခု ပြာသိုလပြည့်ကျော် (၂) ရက် တလဂုင်္နီနိတွင် ပင်းဝါ (ရာမူး) ရာဇဖက်အရပ်၌ မြန်မာတပ်များအား လွှဲအပ်ပီးလိုက်၏။ အင်္ဂလိပ်မြို့ဝန်ကိုယ်တိုင် ကုလားဆင်ချောင်းဖျားတိုင်အောင် လိုက်ပို့ပီး၏။

သို့သော် ရခိုင့်ဂေါင်းဆောင်များဖြစ်ကြသော ဗိုလ်စိန်ရောင်၊ ဗိုလ်မြရောင်၊ ဗိုလ်ပက်လက်၊ ဗိုလ်ကိုးခွက်စား၊ ဗိုလ်ထွန်းဦး၊ ဗိုလ်မျက်တောင်ဖြူ၊ ဗိုလ်တိုင်းချစ်ပရံ၊ နတ်တောင်စားဗိုလ်ရွှေကျော်၊ ဗိုလ်ဆယ်ခင်းစီးစသော သွီးသောက်ရဲဗိုလ်ကိုးဦးကား အင်္ဂလိပ်ရို့၏အဖမ်းအဆီးကိုတိမ်းယှောင်ကာ မြန်မာကျူးကျော်သူများအား အယာမခံ စွမ်းမာန်တရဲ ဆက်လက်တော်လှန်တိုက်ပွဲဝင်ခကတ်ပါသည်။

ဤသည်မှာ ပထမအကြိမ် (ရခိုင့်တော်လှန်ရေးနိဒါန်း) ပင်ဖြစ်ပါသည်။

ရခိုင်တော်လှန်ရေးနိဒါန်း (ဒုတိယပိုင်း)

မြန်မာမြို့ဝန် ငလှရာဇာ (ခေါ်) ငကျော်လှသည် နှစ်နှစ်ခန့်ကြာသော် ရာထူးမှပြုတ်ကျ၏။ မြန်မာငစိန်ဘူးသည် ငလှကျော်ထင်နာမည်ကိုခံ၍ ရခိုင်သက္ကရာဇ် (၁၁၅၆) ခု နတ်တော်လတွင် ရခိုင်နိုင်ငံ မြောက်ဦးမြို့တွင် ၀န်ပြုလာ၏။ ထို့အပြင် ဘိုးတော်င၀ိုင်းလည်း မင်းကွန်းစေတီတည်ရန် ရခိုင်လူမျိုးနှစ်ထောင်ပီးရမည်ဟု တောင်းလာပြန်၏။ ရခိုင်နိုင်ငံတ၀ှမ်း လေးမြို့၊ မြောက်ဦး၊ သံတွဲ၊ ရမ်းပြည်။ မာန်အောင်ရို့မှ အုတ်ဖုတ်ရန်အတွက် လူပေါင်းနှစ်ထောင်ကို စုရုံးကောက်ခံလာသောကြောင့် မခံမရပ်နိုင်သော ရခိုင်ပြည်သူပြည်သားများသည် လက်ယာမြန်ရွာအုပ် ဗိုလ်ထုံးစံ၊ ဗိုလ်ကောစွေ၊ င်္ဒဂါးတောင်စား ဗိုလ်တုံးစံရွှီရို့၏ ဦးဆောင်မှုကိုခံယူကာ ရခိုင်သက္ကရာဇ် (၁၁၆၀) ပြည့် တန်းဆောင်ဘုန်းလဆန်း င်္အဂါနိတွင် မြန်မာကျူးကျော်သူများအား ထပ်မံတော်လှန်ပါသည်။

မြို့စောင့်မြန်မာတပ်ရို့လည်း ရခိုင်ရို့၏တော်လှန်မှုကိုတိုက်ဖျက်ရန် သူရဲလက်နက်များစွာနှင့် မြို့သူကြီးငသံတွေ၏သား စိုင်းတင်စားဗိုလ်ချင်းပြန်ကို စေလွှတ်လိုက်၏။ မယူကမ်းအောင်တပ်သို့ရောက်လျှင် သစ္စာစောင့်သိသော ဗိုလ်ချင်းပြန်သည် မြန်မာမြို့ဝန် သီရိငကျော်ထင်နှင့် အခွန်စာရွီး ဇေယျငကျော်ရို့အား အစတုန်းသတ်ပစ်လိုက်၏။ ဗိုလ်ချင်းပြန်သည် အောင်တပ်အရပ်က စတင်တော်လှန်၍ လက်ရုံးဗိုလ်နှင့်ပူးပေါင်းကာ မယူကမ်းအောင်တပ်တွင် တပ်တည်၍နီ၏။ ရခိုင်နိုင်ငံ သံတွဲမြို့ကို ကျူးကျော်အုပ်ချုပ်နီသော မြန်မာကျော်ထင် ငသီဟသည် ဤသတင်းကိုကြားသောအခါ ရဲမက်ဗိုလ်ပါအပေါင်းဖြင့် မြောက်ဦးသို့ချီလာ၍ ရမ်းပြည့်၊ မာန်အောင်၊ လေးမြို့ဝန်ရို့အား ဗိုလ်ချင်းပြန်အားတိုက်ခိုက်ရန် မယူကမ်းသို့ချီတက်ခိုင်း၏။

ရခိုင်သက္ကရာဇ် (၁၁၆၀) ပြည့် ပြာသိုလတွင် မယူကမ်းကျွဲရိုင်းခုံ၌ တပ်တည်၍နီသော ရခိုင်ဂေါင်းဆောင်ဗိုလ်ချင်းပြန်၊ လက်ရုံးဗိုလ်၊ ပလက်စားဗိုလ်စံအမှုးပြုသော ရခိုင်တပ်များနှင့် ကျူးကျော်လာသော မြန်မာတပ်ရို့ အကြီးအကျယ်တိုက်ပွဲဖြစ်ပွား၏။ ဗိုလ်ချင်းပြန်ရို့တပ်သည် အနောက်စစ်တကောင်းနယ်သို့ ဆုတ်ခွာပီးရ၏။ မြန်မာတပ်ရို့သည် နောက်ကလိုက်၍ ပင်းဝါဂေါ်တောပလ္လင်တွင် တပ်တည်လာ၏။ ထိုအကြောင်းကို စစ်တကောင်း အင်္ဂလိပ်မြို့ဝန်ကြားသော် အင်္ဂလိပ်စစ်တပ်အားချီတက်ခိုင်း၍ ဂေါ်တောပလ္လင်တွင် တပ်ပြိုင်ချထား၏။ ထိုအကြောင်းကို ဘိုးတောင်င၀ိုင်းကြားသောအခါ ပင်းတလဲငဗိုလ်ကို တောင်ကြောင်းခရီး၊ အရှိဝင်းမှုးငတာကို ရီကြောင်းခရီး၊ အသီးသီးလွှတ်၍ အင်အားဖြည့်တင်းလာ၏။

ရခိုင်သို့ရောက်သောအခါ မြန်မာကျူးကျော်သူများသည် ရခိုင်တော်လှန်ရေးဂေါင်းဆောင်ကြီးများဖြစ်ကြသော ဗိုလ်ချင်းပြန်၊ လက်ရုံးဗိုလ်၊ ပလက်စားဗိုလ်စံ၊ ဗိုလ်ကောစွေ၊ ဗိုလ်တုံးစံရွှေရို့အားဖမ်းပီးရန် အင်္ဂလိပ်အစိုးရထံ တောင်းခံ၏။ အင်္ဂလိပ်ကမပီးဘဲငြင်းဆန်သောအခါ ရခိုင်သက္ကရာဇ် (၁၁၆၀) ပြည့် တပိုးထွဲလပြည့်နိတွင် မြန်မာကျူးကျော်တပ်နှင့် အင်္ဂလိပ်တပ် စစ်ဖြစ်ပွား၏။ အင်္ဂလိပ်ဖက်မှ အင်္ဂလိပ်ဗိုလ်မှုးနှစ်ဦးကျဆုံး၍ ကုလားစစ်သည် (၁၀၀) ကျော် သီဆုံး၏။ ကျူးကျော်သူမြန်မာတပ်ရို့သည် ဗိုလ်ချင်းပြန်၏တော်လှန်မှုကိုအကြောင်းပြု၍ ရခိုင်နိုင်ငံအ၀ှမ်း ရခိုင်သားအမြောက်အမြားကို သတ်ပစ်လိုက်၏။

ဤသည်မှာ ရခိုင်သက္ကရာဇ် (၁၁၅၇) ခုနှစ်မှ (၁၁၆၀) ပြည့်နှစ်အထိ ဒုတိယပိုင်း ရခိုင်တော်လှန်ရေးနိဒါန်း စိုင်းတင်မြို့စားဗိုလ်ချင်းပြန်၏ ပထမအကြိမ် မြန်မာတော်လှန်ရေးဖြစ်သည်။

ရခိုင့်တော်လှန်ရေးနိဒါန်း (တတိယပိုင်း)

ရခိုင်သက္ကရာဇ် ၁၁၆၀ မှ ၁၁၇၃ ခုအထိ ဒုတိယပိုင်း ရခိုင့်တော်လှန်ရေးနိဒါန်း
ဗိုလ်ချင်းပြန်၏ ဒုတိယအကြိမ် မြန်မာတော်လှန်ရေး

မြန်မာရို့သည် ရခိုင်တော်လှန်ရေးဂေါင်းဆောင်များဖြစ်ကြသော ဗိုလ်ချင်းပြန်၊ လက်ရုံးဗိုလ်၊ ပလက်စားဗိုလ်စံ၊ ဗိုလ်တုံးစံရွှေ၊ အရှိဝင်းမှူး၊ လက်ဝဲမြန်ဖောင်သာရို့အားဖမ်းဆီးပီးရန် အင်္ဂလိပ်အစိုရထံ အကြိမ်ကြိမ်တောင်းဆို၏။ အိန္ဒိယတိုင်းမင်းကြီးလည်း အကောက်ဝန်ဧရကောက်ကိုသံပြု၍ မြန်မာဝန်များဖြစ်ကြသော ကျော်ထင်ငသီဟ၊ ရမ်းပြည့်ဝန် ငလယ်ကိုင်းစား၊ မာန်အောင်ဝန်ရို့နှင့် ရခိုင်သက္ကရာဇ် (၁၁၆၁) ခု နတ်တော်လတွင် မြောက်ဦးမြို့ ဗားဗူတောင်ထိပ်၌ မျက်နှာစုံညီအစည်းအဝေးပြု၏။

သက္ကရာဇ် ၁၁၆၈ ခု နံယုန်လတွင် ယိုးဒယားထိုင်းနိုင်ငံသို့ စစ်တိုက်ရန် ရခိုင်လေးမြို့တွင်နီသော လူပေါင်းများစွာကို မြန်မာရို့သည် အတင်းအဓမ္မသိမ်းရုံးဆောင်ယူလား၏။ ဗိုလ်ချင်းပြန်သည် စစ်တကောင်းနယ်မှ ယှောင်ထွက်လာပြီးလျှင် များစွာသောသူရဲအပေါင်းနှင့် နတ်မြစ်လက်ယာဖက်၌အစောင့်ချထားသော မြန်မာတပ်မှူးမုံတောစားကို ခြီမှုန်းပြီးလျှင် မယူကမ်းအောင်တပ်၌ အောင်တပ်တည်၍နီ၏။

သက္ကရာဇ် ၁၁၇၃ ခု ကဆုန်လတွင် မြောက်ဦးမြို့ကို အကြီးအကျယ်ထိုးနှက်တိုက်ခိုက်၍ မြန်မာကျူးကျော်သူများထံမှ ပြန်လည်သိမ်းပိုက်ရယူလိုက်၏။ ဤသည်ကိုကြားလျှင် မာန်အောင်၊ ရမ်းပြည်၌တပ်စွဲထားသော မြန်မာတပ်များလာ၍တိုက်၏။ ဗိုလ်ချင်းပြန်၏တပ်များသည် လက်နက်အင်အားမမျှသဖြင့် ဆုတ်ခွာကာ ဆည်တိုင်ကန်တွင် တပ်တည်၍နီ၏။

မာန်အောင်ဝန် ငရန်တိုင်၊ ရမ်းပြည့်ဝန် လက်ယာစည်သူ ငနော်ရထာ၊ သံတွဲဝန်ငရွှေပန်းစသော မြန်မာကျူးကျော်သူများသည် ဗိုလ်ချင်းပြန်တပ်စွဲရာသို့ လာ၍တိုက်၏။ သို့သော် မာန်အောင်ဝန်အစဟိသော မြန်မာကျူးကျော်သူများသည် တယောက်မကျန် ခြီမှုန်းခြင်းခံရ၏။ ထိုအခါ မြန်မာတပ်မှူး ဗိုလ်မှူးရို့သည် ရှိဆက်မတိုက်ဝံ့ဘဲ ကြောက်ရွံ့ကာ လောင်းကိုပစ်၍ ကုန်းကြောင်းထွက်ပြီးကြကုန်၏။

မြန်မာငရွှေပန်း၊ ရမ်းပြည့်မြန်မာဝန် လက်ယာစည်သူ ငနော်ရထာရို့သည် သူရဲဘောကြောင်စွာ ထွက်ပြီးကြကုန်၏။ ထိုအခါ ဗိုလ်ချင်းပြန်နှင့် လက်ရုံးဗိုလ်ရို့သည် မြန်မာလူမျိုးအများအပြားကိုသတ်၍ လက်နက်အမြောက်အများကို သိမ်းပိုက်ရယူလိုက်၏။ ဗိုလ်ချင်းပြန်လည်း ဗိုလ်ချုပ်မျက်တောင်ရှည်ကို နန္ဒိသေနဗန္ဓုလဘွဲ့အပ်နှင်း၍ စစ်သူကြီးအရာပီးသနားတော်မူ၏။ ဗိုလ်ချင်းပြန်။ လက်ရုံးဗိုလ်၊ ဗိုလ်ချုပ်မျက်တောင်ရှည်ရို့ဦးဆောင်သော ရခိုင်တပ်ရို့သည် ဆက်လက်ချီတက်ကာ ရမ်းပြည့်၊ မာန်အောင်၊ သံတွဲနယ်အားလုံးကို မြန်မာကျူးကျော်သူများလက်ထဲမှ ပြန်လည်သိမ်းပိုက်ရယူလိုက်၏။

ရခိုင်နိုင်ငံတော်၏ပြည်မဖက်တွင် ဗိုလ်ချင်းပြန်သည် လက်ယာမြန်အရပ်၌ ပလက်စားဗိုလ်စံ၊ တပ်မှူးဗိုလ်မောင်ရွှေရို့ကို၎င်း၊ ငရကောက်အရပ်၌ နောင်တော်လေးမြို့စားကျော်အောင်ကို၎င်း၊ ရွှေနတ်ပင်အရပ်၌ ဗိုလ်အောင်ကျော်ရွှီကို၎င်း၊ လောင်းကြက်မြို့ဟောင်း၌ ဗိုလ်စော်ကဲ၊ တပ်မှူးသောက်ကြာအောင်ကို၎င်း၊ ရန်းဝမြစ်က ဗိုလ်နန်းရွှီ၊ တပ်မှူးသာရကန္တ၊ ဗိုလ်တိုးအောင်ကျော်ရို့ကို၎င်း၊ ခုနှစ်ခရိုင်တောင်စိုင်တွင် မြန်မာရို့လာလမ်းဖြစ်သော မအီအရပ်က တောင်စားဗိုလ်မှူးမောင်ညို၊ တပ်မှူးညိုရောင်ဖြူရို့အား အသီးသီးတပ်စောင့်ချထား၏။

ဤသို့အသီးသီးတပ်စောင့်ချထားပြီး ဗိုလ်ချင်းပြန်သည် ဂစ္ဆပနဒီမြန်အနောက်ဖက်ကမ်း ရိုးငူအရပ်၌ တပ်စီးတပ်နင်းပြု၍နီသည်ကို ဘိုးတော်င၀ိုင်းကြားသောအခါ ရခိုင်နိုင်ငံတော်တွင်ကျန်ဟိနီသော အကြွင်းအကျန်မြန်မာတပ်ရို့အား အင်အားဖြည့်တင်းရန် ငလှစည်သူကို စေလွှတ်လိုက်၏။ ထိုနှစ်တွင် ဗိုလ်ချုပ်မျက်တောင်ရှည်၊ လမ္မုစားရို့ဦးစီးသော ရခိုင်တပ်များနှင့် ရမ်းပြည့်မြို့တွင်ဟိသော မြန်မာတပ်များ အကြီးအကျယ်တိုက်ပွဲဖြစ်ပွား၏။ ရခိုင်တပ်များသည် အင်အားဖြည့်တင်းထားသော မြန်မာတပ်များနှင့်တိုက်ခိုက်ရာ အင်အားမမျှသဖြင့် လက်ဖန်အညာအရပ်သို့ဆုတ်ခွာပီးရကာ ရခိုင်သက္ကရာဇ် ၁၁၇၃ ခု ၀ါခေါင်လဆန်း (၂) ရက် စနီနိတွင် စနည်းချောင်း၌ လှီတပ်တည်၍နီ၏။

သံတွဲမြို့ကိုဝိုင်းရံထားသော ရခိုင်ဗိုလ် မြို့သစ်စားမောင်ငယ်၊ ဗိုလ်ဘချစ်ရည်ရို့လည်း စစ်ရေးမသာသောကြောင့် ထိုသက္ကရာဇ် ၀ါခေါင်လတွင် လမ္မုချောင်းဝ၌ တပ်တည်၍နီရကုန်၏။ မာန်အောင်မြို့ကို ၀ိုင်းရံထားသော လက်ရုံးဗိုလ်၊ တိမ်ကြားဗိုလ်ရို့လည်း စစ်ရေးမမျှသဖြင့် မာန်အောင်မြို့ အုန်းချောင်းဝ၌ တပ်တည်၍နီရ၏။

ဤသို့ ရမ်းပြည့်၊ သံတွဲ၊ မာန်အောင်ရို့၌ ရခိုင်တပ်ရို့ အင်အားမသာကြောင်းကြားသိရလျှင် မြန်မာမြို့ဝန် ငလှစည်သူသည် အသစ်ခန့်ထားသော မာန်အောင်ဝန်ကို အရှိခုနှစ်ခရိုင်ကိုတိုက်ရန် လွှတ်လိုက်၏။ မြန်မာမာန်အောင်ဝန် သူရဲတထောင်နှင်ချီလာပြီး ရခိုင်သက္ကရာဇ် ၁၁၇၃ ခု ၀ါခေါင်လပြည့်နိ၌ မအီချောင်းဝတွင် တပ်တည်လာ၏။ ယင်းသို့ တပ်တည်လာသော မာန်အောင်ဝန်သစ်တပ်အား ရခိုင်ဗိုလ်လမ္မုစားရွှေလူလား၍တိုက်သော် မြန်မာမာန်အောင်ဝန်သစ်တပ်တည် တယောက်မကြွင်းပြုန်း၏။

ထိုအခါ မြန်မာဆင်ဖြူကျွန်းဗိုလ်သည် အရေးမလှသောမြန်မာတပ်ရို့အား အင်အားဖြည့်တင်းရန် လူတထောင်နှင့် စစ်ကူရောက်လာ၏။ ၄င်းသက္ကရာဇ် တော်သလင်းလတွင် ဒါးလချောင်းဝ၌ တပ်တည်လာပြန်၏။ ထိုသတင်းကိုကြားသောအခါ မြန်မာဆင်ဖြူကျွန်းဗိုလ်တပ်အား ရခိုင်တိမ်ကြားဗိုလ်တပ်လား၍တိုက်သော် မြန်မာတပ်ရို့ အတုန်းအရုံးသီကြီပျက်စီး၏။ ယင်းနှစ်တွင် မြောက်ဦးဝန် မြန်မာငကျော်ထင်သည် မြို့သူကြီးငရကောက်ကို ဗိုလ်ချုပ်ခန့်ပြီးလျှင် ကုန်းအားရီအားချီလာပြီး လောင်းကြက်မြို့ဟောင်း၌ တပ်စောင့်ချ၍နီသော ရခိုင်ဗိုလ်စော်ကဲ၊ ဗိုလ်မှူးသောက်ကြာအောင်ရို့တပ်အား အကြီးအကျယ်ထိုးနှက်တိုက်ခိုက်၏။ တပ်မှူးသောက်ကြာအောင်သည် လက်နက်ထိမှန်သီဆုံး၏။

၎င်းသက္ကရာဇ် တန်းဆောင်ဘုန်းလဆုတ် (၅) ရက် တလင်းလာနိတွင် လက်ယာမြန်အရပ်၌ တပ်စောင့်နီသော ပလက်စားဗိုလ်စံ၊ တပ်မှူးမောင်ရွှေရို့ဦးစီးသောရခိုင်တပ်ရို့အား မြန်မာတပ်ရို့လာတိုက်သဖြင့် အင်အားနည်းသော ရခိုင်တပ်များသည် ကုန်းကြောင်းအားဖြင့် ဆုတ်ခွာပီးရ၏။ ငရကောက်အရပ်၌ တပ်စွဲထားသော ဗိုလ်အောင်ကျော်၊ ရွှေနတ်ပင်တပ်စောင့် ဗိုလ်အောင်ကျော်ရွှီရို့လည်း ဗိုလ်ချင်းပြန်နီသော ဇေယျဝတီမြို့သို့ဆုတ်ခွာပီးရ၏။

အရေးမသာသောအခြင်းအရာများကို ကြားရသောအခါ ဗိုလ်ချင်းပြန်သည် ဇေယျဝတီမြို့၌ဟိသော တပ်မှူးဗိုလ်မှူးရို့နှင့်တိုင်ပင်၍ စစ်ယှုံးသော ဗိုလ်မျက်တောင်ရှည်၊ လမ္မုစားဗိုလ်ရွှေလူ၊ ဗိုလ်တလိုင်းရှည်၊ ဒင်္ဂါးတောင်စား တုံးစံရွှီ၊ ဗိုလ်စော်ကဲအစဟိသော သုံးရာ့ခုနှစ်ကျိတ်သောလူရို့ကို မြန်မာနှင့်စစ်ပြီးသောအခါ အကုန်သူအား သတ်ပစ်မည်ဟု မှားယွင်းစွာတိုင်ပင်၏။

ထိုအခိုက် မြန်မာတိုင်းတာဝန် အာကာငကျော်ထင်သည် နဂါးရစ်မော်တင်လမ်းက ချီလာ၏။ မကျည်းကျွန်းအနားသို့ရောက်သောအခါ စတုကျွန်း၌တပ်စောင့်ချနီသော ရခိုင်ဗိုလ် တိုးအောင်ကျော်တပ် ဆီးကြိုတိုက်ခိုက်သဖြင့် မြန်မာတိုင်းတာဝန် အာကာငကျော်ထင်သည် မခံမရပ်နိုင်ဖြစ်ပြီး ထွက်ပြီး၍ သံတွဲမြို့ထဲသို့ခိုဝင်ကာ သံတွဲဝန်နှင့်ပေါင်းဖက်၍နီ၏။ တခါ ဗိုလ်ကျားကြီး၊ မြို့သစ်စား ငဝေစသော မြန်မာတပ်များပေါင်းဖက်၍ စတုမြစ်သို့ချီလာပြန်၏။

မြန်မာဗိုလ်ကျားကြီးတပ်နှင့် စတုကျွန်း၌တပ်စွဲနီသော ရခိုင်တပ်ရို့သည် ရီကြောင်းတိုက်ပွဲဖြစ်ပွားရာ စစ်ကူမရသော ရခိုင်တပ်များ အရေးမလှဆုတ်ခွာပီးရ၏။ ၄င်းရခိုင်စတုတပ်လည်း ရမ်းပြည့်စနည်းဖက်သို့ခိုဝင်ကာ ဗိုလ်မျက်တောင်ရှည်တပ်နှင့် ပေါင်းဖက်၍နီ၏။

ထိုအခါ မြန်မာတိုင်းတာဝန်အာကာငကျော်ထင်နှင့် မြင်းဝန်ငမှိုင်းရို့သည် ကုန်းရီအားချီလာပြီး သံစစ်မြစ်သို့ရောက်လျှင် စနည်းတွင်တပ်ချ၍နီသော ဗိုလ်ချုပ်မျက်တောင်ရှည်တပ်နှင့်တွိဆုံ၍ တိုက်ပွဲဖြစ်ပွား၏။ ဗိုလ်ချင်းပြန်ပြောဆိုသောစကားကိုကြားနှင့်ပြီးသော ဗိုလ်ချုပ်မျက်တောင်ရှည်သည် အနည်းငယ်မျှ ရင်ဆိုင်တိုက်ခိုက်ပြီး ယှောင်ထွက်လားလီ၏။

မြန်မာတိုင်းတာဝန်ငကျော်ထင်လည်း ရမ်းပြည့်၊ မာန်အောင်၊ သံတွဲမြို့ကို အစောင့်ချထားခပြီးလျှင် မြောက်ဦးမြို့တော်သို့ ချီတက်လာ၏။ ကျောက်ငနွားအရပ်သို့ရောက်သောအခါ ရခိုင်တပ်များနှင့်တွိဆုံ၏။ သို့သော် ရခိုင်တပ်မှူးရို့သည် ဗိုလ်ချင်းပြန်၏စကားကို ကြားနှင့်ပြီးဖြစ်သောကြောင့် တိုက်ခိုက်လိုသည့်ဆန္ဒမဟိဘဲ တိမ်းယှောင်၍ နီကုန်၏။

ဗိုလ်ချင်းပြန်လည်း ကျူးကျော်လာသောမြန်မာတပ်ရို့အားတိုက်ခိုက်ရန် လမ္မုစားရွှေဗိုလ်၊ မြုံထောင်စားရို့ကို ထပ်လောင်း၍ ချီတက်ခိုင်း၏။ ရခိုင်တပ်မှူးဗိုလ်မှူးရို့သည် ဗိုလ်ချင်းပြန်၏အကြံကို သိရင်းစွဲဟိကြသည်နှင့် ထိုသို့ဤသို့ရာ တိမ်းယှောင်လားကြကုန်၏။ ဗိုလ်ချင်းပြန်သည် ဤအခြင်းအရာကို ကြားသိရသောအခါ မတည်မရပ်နိုင်ဘဲ နောင်တပူပန်ယူကျုံးမရဖြစ်ကာ လေးမြို့နီ ရခိုင်လူဦးရေစုစုပေါင်း ကိုးသောင်းကိုးထောင်ကို သိမ်းကျုံးပြီး ရခိုင်သက္ကရာဇ် ၁၁၇၃ ခု ပြာသိုလပြည့် ဗုဒ္ဓူးနိတွင် ဇေယျဝတီမြို့မှ အင်္ဂလိပ်ပိုင် အနောက်ဘင်္ဂလားနယ်သို့ တိမ်းယှောင်ထွက်ခွာလာရ၏။

မြန်မာတိုင်းတာဝန် အာကာငကျော်ထင်သည် တပ်အလုံးအရင်းဖြင့် အနောက်ဘင်္ဂလားဖက်သို့ချီတက်လာပြီး မုံတောတွင် တပ်စခန်းချလာပြန်၏။ ဤသို့ မြန်မာတိုင်းတာဝန်တပ်ချီလာကြောင်းကို အင်္ဂလိပ်စစ်တကောင်းမြို့ဝန် ကြားသိလျှင် အင်္ဂလိပ်တပ်များသည်လည်း အင်အားများစွာနှင့် နတ်မြစ်လက်ယာဖက်ကမ်းအရပ်၌ တပ်တည်လာ၏။ ဤသို့ ဗိုလ်ချင်းပြန်နှင့် လက်ရို့ဗိုလ်ရို့သည် ရခိုင်နိုင်ငံတ၀ှမ်းလုံးအား မြန်မာကျူးကျော်သူများလက်ထဲမှ ပြန်လည်သိမ်းပိုက်ထိမ်းချုပ်နိုင်ပြီးခါမှ မြန်မာစစ်အင်အားဖြည့်တင်းလာသည်ကို မခုခံနိုင်ဘဲ ပြန်လည်ဆုတ်ခွာ ပီးလိုက်ရကုန်၏။

(ဤသည်မှာ ရခိုင်သက္ကရာဇ် ၁၁၆၀ မှ ၁၁၇၃ ခုအထိ ဒုတိယပိုင်း ရခိုင့်တော်လှန်ရေးနိဒါန်း စိုင်းတင်မြို့စား ရခိုင်ဗိုလ်ချင်းပြန်၏ ဒုတိယအကြိမ် မြန်မာတော်လှန်ရေး ဖြစ်ပါသည်)

ရခိုင့်တော်လှန်ရေးနိဒါန်း (တတိယပိုင်း)

ရခိုင်သက္ကရာဇ် ၁၁၇၄ မှ ၁၁၈၅ အထိ ဒုတိယပိုင်း ရခိုင့်တော်လှန်ရေးနိဒါန်း
ဗိုလ်ချင်းပြန်၏ တတိယအကြိမ် မြန်မာတော်လှန်ရေး

ဗိုလ်ချင်းပြန်သည် အနောက်ဘင်္ဂလားနယ်သို့ ခိုလှုံလာရပြီးနောက် ယောက်ဖတော်လက်ရုံးဗိုလ်နှင့် စွမ်းရည်ဟိသော တပ်မှုးဗိုလ်မှုးရိုအား ပြန်လည်စုရုံးပြီးလျှင် သူရဲလက်နက်ကိုင်များကိုလွှတ်၍ ရခိုင်သက္ကရာဇ် ၁၁၇၄ ခုနှစ် ကဆုန်လတွင် မြန်မာရို့တပ်စွဲထားသော ငကြည်းတောင်တပ်ကို တိုက်ခိုင်း၏။ မြန်မာတပ်မှုးငလွန်းသည် အရေးမလှ ယှုံးနိမ့်ထွက်ပြီးရ၏။

ထိုအကြောင်းကို မြန်မာဝန်ငကျော်ထင်ကြားသော် ဗိုလ်မှုးတပ်မှုးသူရဲလက်နက်ကိုင်များကို စေလွှတ်၍ ရခိုင်တပ်များအား တိုက်ခိုင်းစီသော် ရခိုင်ဗိုလ်ချင်းပြန်တပ်သားများသည် မခံမရပ်နိုင်၍ ဘင်္ဂလားနယ်သို့ ဆုတ်ခွာပီးရ၏။ အင်္ဂလိပ်အစိုးရလည်း လမ္ဗုစားဗိုလ်ရွှေလူနှင့် ဗိုလ်ချင်းပြန်မယား (မိမင်း) ရို့အား လှည့်ဖျားခေါ်ယူပြီးလျှင် ဒေလီပဆာသို့ပို့ဆောင်ကာ အစောင့်အယှောက်ဖြင့်ထား၏။ ဗိုလ်ချင်းပြန်ယောက်ဖ လက်ရုံးဗိုလ်သည် အင်္ဂလိပ်၏အဖမ်းအဆီးခံရ၍ စစ်တကောင်း၌အကျဉ်းချထားလီရာ အကျဉ်းထောင်၌ပင် ကွယ်လွန်အနိစ္စရောက်၏။

သို့တိုင်အောင် အယာမခံ ဗိုလ်ချင်းပြန်သည် တပ်မှုးဗိုလ်မှုးလူသူလက်နက်ရို့အား စုရုံးပြီးလျှင် ဘင်္ဂလားမှပြန်ထွက်ခွာကာ နတ်မြစ်လက်ယာဖက် မင်္ဂလာကြီးအရပ်၌တပ်တည်၍ မြန်မာကျူးကျော်သူရို့အား ထပ်မံတော်လှန်၏။ ဗိုလ်ချင်းပြန်သည် သူ၏အစ်ကို လေးမြို့စားအောင်ကျော်၊ ဒင်္ဂါးတောင်စား တုံးစရွှီ၊ ဗိုလ်စော်ကဲနှင့် တပ်မှုးဗိုလ်မှုးရို့အားရုံးစု၍ သူ၏ယောက်ဖအသက်နှံကို ဗိုလ်ချုပ်ခန့်ကာ မြန်မာဝန်ငကျော်ထင်ကို ရီကြောင်းကုန်းကြောင်းချီ၍ တိုက်၏။ ဤအကြောင်းကို မြန်မာဝန်ငကျော်ထင်ကြားသိသော် ရမ်းဗြဲမှ မြန်မာသူရဲများနှင့် ရမ်းဗြဲဝန် လက်ယာငစည်သူကို ဗိုလ်ချုပ်ခန့်၍ ချီတက်ခိုင်းရာ ရခိုင်သက္ကရာဇ် ၁၁၇၄ ခု ပြာသိုလတွင် ရခိုင်ဗိုလ်ချင်းပြန်၏တပ်နှင့် မိုးစည်းမြစ်တွင်တွိဆုံ၍ ရင်ဆိုင်တိုက်ပွဲဖြစ်ပွား၏။ ဗိုလ်ချင်းပျံ၏တပ်များ လက်နက်အင်အားမမျှသဖြင့် မိုးစည်းကျွန်းသို့ ဆုတ်ခွာပီးရ၏။ ထိုအခါ မြန်မာတပ်ရို့သည် မိုးစည်းကျွန်း၌ဟိသော ရခိုင်ပြည်သူအပေါင်းအား ဗိုလ်ချင်းပြန်၏လူဟုစွပ်စွဲပြီး မြီလှန်သတ်ဖြတ်လိုက်၏။

ထိုအကြောင်းကို နောက်ချီလာသော ဗိုလ်အောင်ကျော်၊ ဗိုလ်ချင်းပြန်၏ယောက်ဖ ဗိုလ်ချုပ်အသက်နှံကြားသိရလျှင် တပ်ရပ်နီပြီး ဗိုလ်ချင်းပြန်သည် မင်္ဂလာကြီးအရပ်ကပြောင်း၍ ရှောက်ချောင်းဖျား၌ ရခိုင်သက္ကရာဇ် ၁၁၇၄ ခု၊ တပိုးထွဲလတွင် သရက်ချိုမြို့ကို တည်၍နီ၏။ မြန်မာစိန်ဘူးငကျော်ထင်သည် အများမကြာသီလွန်၏။

စိန်ဘူးငကျော်ထင်သီလွန်ပြီးနောက် မြန်မာ မဟာငနော်ရထာသည် ရခိုင်သက္ကရာဇ် ၁၁၇၅ ခုနှစ် နတ်တော်လတွင် ရခိုင်ဝန်ပြုလာ၏။ ဗိုလ်ချင်းပြန်လည်း သမက်တော် တိမ်ကြားဗိုလ်နှင့် တပ်မှုးဗိုလ်မှုးရို့အား အသီးသီးခန့်၍ သူရဲတထောင်နှင့် မြန်မာမြို့ဝန် မဟာငနော်ရထာကို တိုက်ရန်စေလွှတ်လိုက်၏။ ဗိုလ်ချင်းပြန်၏တပ်မှုးဗိုလ်မှုရို့လည်း တပ်ချီတက်လာ၍ ဂစ္ဆပနဒီမြစ်ညှာဝသို့ရောက်သောအခါ မြန်မာငနော်ရထာသတင်းရပြီး မြန်မာမြို့သူကြီး ငရန်ကင်းကို ဗိုလ်ချုပ်ခန့်၍ များစွာသော လက်နက်ကိုင်ရို့နှင့် ချီတက်ခိုင်း၏။ ထိုအခါ ရခိုင်သက္ကရာဇ် ၁၁၇၅ ခု ပြာသိုလတွင် ဂစ္ဆပနဒီ (ကုလားတန်) မြစ်ညှာကူးဝတွင် ရခိုင်ဗိုလ်ချင်းပြန်၏တပ်နှင့် မြန်မာတပ်များ ရခိုင်တိုက်ပွဲဖြစ်ပွား၏။ ဗိုလ်ချင်းပြန်တပ်များ များစွာထိခိုက်နစ်နာ ဆုံးယှုံး၏။ ထိုအခါ ဗိုလ်ချင်းပြန်လည်း သရက်ချိုမြို့မှ ပြောင်းရွှိကာ ပင်းဝါ (ရာမူး) ဘင်္ဂလားနယ်သို့ ဆုတ်ခွာလာ၏။ ကြွင်းကျန်သော ရခိုင်တပ်ရို့သည်လည်း မြန်မာတပ်ရို့၏၀ိုင်းဝန်းပိတ်ဆို့တိုက်ခိုက်ခြင်းခံရ၏။ သို့သော် ရခိုင်သူရဲရို့သည်ကား မြန်မာကျူးကျော်သူများအား အယာမခံ စွမ်းမံတရဲ အလံမလှဲ တော်လှန်တိုက်ပွဲဝင်ခကတ်ပါသည်။

ဗိုလ်ချင်းပြန်သည် ပင်းဝါရာမူးနယ်သို့ ၀င်ရောက်လာကြောင်းကို စစ်တကောင်းအင်္ဂလိပ်မြို့ဝန်ကြားသိလျှင် ဗိုလ်ချင်းပြန်အားဖမ်းဆီးစီပြန်၏။ ဗိုလ်ချင်းပြန်သည် တောနက်ထဲသို့ ၀င်ပုနုးနီရ၏။ မြန်မာဝန် မဟာငနော်ရထာလည်း ရခိုင်သက္ကရာဇ် တပေါင်းလမှစ၍ အနောက်ပြည်မှလာသော ရခိုင်သားရို့အား၎င်း၊ ရခိုင်ပြည်၌ကြွင်းကျန်ရစ်သောလူသန်လူမြန်အားလုံးအား ဗိုလ်ချင်းပြန်၏လူဟုစာရင်းသွင်းကာ အစတုံး ခြီမှုန်းပစ်လိုက်၏။

၁၁၇၄ ခုနှစ်မစ၍ (၅) နှစ်တိုင်တိုင် ရခိုင်ပြည်၌ စပါးဆန်ရီယှားပါးကာ အငတ်ဘေးကြောင့် လူပေါင်းမြောက်များစွာ သီကြီပျက်စီး၏။ ထိုနောက် ရခိုင်သက္ကရာဇ် ၁၁၇၇ ခု၊ တပိုးထွဲလ ခရစ်သက္ကရာဇ် ၁၈၁၅ ခု ဇန္န၀ါရီလ (၂၄) ရက်နိတွင် ဗိုလ်ချင်းပြန်သည် ပင်းဝါ ဖလောင်းဆူအရပ်၌ ဆုံဆို့နာဖြင့် ကွယ်လွန်အနိစ္စရောက်၏။ ဇန္န၀ါရီ (၂၈) ရက်နိတွင် ကောင်းမွန်စွာသဂြိုဟ်ခြင်းပြီးစီး၏။

(ဤသည်မှာ ဒုတိယပိုင်းရခိုင်တော်လှန်ရေးနိဒါန်း စိုင်းတင်မြို့စားဗိုလ်ချင်းပြန်၏ တတိအကြိမ်မြောက် မြန်မာတော်လှန်ရေး ဖြစ်သည်။)

(ရခိုင်ပေါင်းကူး သာလှဦး)


||202.151.197.26||3/22/2009 8:41:19 AM||


Email Address:

Zawgyi-One Keyboard Press (Ctrl + Shift) To Type. Font Download (Click Run. Password = zawgyimandalay)

Please type "arakan"



|Save Document| |Print Document|